Përfaqësuesja U-21 e Kosovës ka marrë sot një lajm të mirë nga UEFA pasi është njoftuar që ka fituar me rezultatin 0-3 në tavolinë ndeshjen kualifikuese të Europianit ndaj Norvegjisë, e vlefshme për Grupin 5.Takimi i zhvilluar më datë 12 qershor në Dramen u fitua në fushë nga vendësit me rezultatin 5-0, por aktivizimi i një futbollisti të palejuar për shkak të pezullimit me kartonë, Kristofer Ajer, solli që Komisioni i Disiplinës së UEFA-s ta kalojë rezultatin e kësaj ndeshjeje në favor të Kosovës së drejtuar nga Rafet Prekazi.
Në grupin kualifikues të Kosovës janë zhvilluar vetëm dy ndeshje të po kësaj përfaqësuese, me të parën e humbur 1-0 në transfertë ndaj Irlandës U-21 dhe të dytën e fituar në transfertë me rezultatin 0-3 ndaj Norvegjisë U-21. Në këtë mënyrë Kosova U-21 mban vendin e dytë në klasifikim me 3 pikë, po aq sa Irlanda U-21 që kryeson për shkak të epërsisë në ndeshje direkte.Ky vendim i marrë nga UEFA pritet që t’i japë një motivim më shumë skaudrës së Kosovës për të bërë paraqitje më pozitive në ndeshjet e ardhshme.
