Prona të shumta të kompanisë Molino, me seli në Lezhë, që administron dhe hotel dhe restorant Jolly në qendër të qytetit kanë dalë në shitje.
Kompania përmbarimore TDR ka njoftuar se për llogari të Bankës Veneto, ndaj të cilës Molino ka një kredi të pashlyer, ka nxjerrë në shitje përmes ankandit një sërë pronash. Ankandi do të zhvillohet në datën 7 korrik.
Në shitje janë 18 pasuri të paluajtshme, me një vlerë totale që arrin në gati 3 milionë euro. Pronat me vlerë më të madhe janë një njësi me sipërfaqe 803 m2, që është vlerësuar me 392 mijë euro; një njësi me sipërfaqe 788 m2, që ka një vlerë prej 766 mijë euro dhe një tjetër pasuri me sipërfaqe 578 m2, që është vlerësuar me 554 mijë euro, të cilat ndodhen të gjitha në lagjen Besëlidhja në Lezhë. Po në këtë lagje është edhe një tjetër pasuri me vlerë të lartë, me sipërfaqe 238 m2, prej 362 mijë euro.
Pasuritë e tjera janë kryesisht apartamente dhe variojnë mesatarisht 36 mijë euro, por ka edhe apartamente me vlerë 100 mijë euro.
Kompania Molino është krijuar në vitin 2008 dhe nga viti 2012 është në pronësi të Gjovalin Tusha, i cili për një periudhë kohore (2014) ka qenë edhe drejtor i Portit të Shëngjinit. Në vitin 2015, Molino ka përthithur edhe “Restorant Jolly” dhe “Hotel Jolly”.
Sipas bilancit të vitit 2015, Molino kishte të ardhura minimale prej 7.2 milionë lekësh (52 mijë euro), nga 22.4 milionë lekë vitin e mëparshëm.
Ajo raporton në bilanc një kredi prej rreth 1.3 milionë eurosh.
Kompania ka një situatë të përkeqësuar financiare, teksa kapitali është 42 milionë lekë dhe detyrimet arrijnë në total 203 milionë lekë, me një paaftësi të dukshme paguese.
/Monitor/
