TIRANË- Fati i 10-vjeçarit Julian Çela të zhdukur në rrethana të paqarta prej pasdites së 30 nëntorit në zonën e Laprakës mbetet ende mister, ndërsa nëna e tij Luze Çela pretendon se ai mbahet peng. Ajo, bashkëshortja e nëndrejtorit të Antiterrorit të SHISH-it, Skënder Çela, nuk di të vërë gishtin te ndonjë person i dyshuar dhe mohon që familja të jetë e përfshirë në konflikte, por parashtroi argumentet e saj në emisionin “Njerëz të humbur” të Aida Shtinos në Televizionin Shqiptar…
“Ai u çua atë ditë, më 30 nëntor, rreth orës 11:30 dhe, pasi hëngri mëngjes, tha që do të dilte aty rrotull nëpër lagje. Rreth orës 12:00 ka takuar të motrën pranë Drejtorisë së Doganave që e kemi pranë shtëpisë dhe ajo i ka thënë që të shkojë në shkollë, ngaqë mësimin e kishte pasdite. Juliani i ka treguar se e ka pushim, pasi me rastin e 28-29 Nëntorit ishte bërë nga shkolla edhe data 30 pushim. E motra, pra vajza ime, është kthyer në shtëpi, ndërsa Juliani i ka thënë se do të rrijë edhe ca me disa shokë ose do shkojë te qendra e internetit në lagje”- ka rrefyer ajo.
Sipas saj shqetesimi ka nisur kur ora shkoi 16:00. Ajo shpreh dyshimin se dikush apo disa persona po e mbajnë në ndonjë banesë Julianin dhe nuk e lënë të dalë. “Po të kishte ikur vetë, do të ishte kthyer tashmë në shtëpi se është pa rroba dhe pa lekë me vete. Plus që djali është shumë i lidhur me mua dhe nuk do kishte ndenjur kaq ditë pa më parë. Nuk ka ndodhur ndonjëherë që të rrijë kaq gjatë larg meje, apo larg familjes”- thote ajo.