Katër hetime paralele kanë nisur nga autoritetet në Greqi, për të hedhur dritë mbi misterin e vrasjes së tre vajzave në Patra, ku e dyshuara kryesore është nëna e tyre, Roula Pispirigou. Protothema.gr shkruan se tashmë janë nxjerrë tre arsyet e mundshme që çuan në këtë akt të tmerrshëm.
E para ka të bëjë me zemërimin që kishte me ish-bashkëshortin, Manos Daskalakis. Ajo mund të ketë dashur hakmarrje ndaj fëmijëve të tij.
Skenari i dytë për motivimet e 33-vjeçares ka të bëjë me nevojën e pangopur që kishte për të tërhequr vëmendjen përmes së keqes që u shkaktonte të tjerëve.
Skenari i tretë fokusohet në rastin e Georginas. Vogelushja mund të ketë dëgjuar apo parë diçka dhe ka pasur frikë se mos zbulohet. Për autoritetet është e hapur mundësia që Georgina të ketë parë diçka që ka të bëjë me vdekjen e motrës së saj 7 muajshe Iris.
33-vjeçarja Roula Pispirigou që është çuar në paraburgim, mohon çdo akuzë, ndërkohë që ka filluar hetimi për të zbuluar shkaqet e vdekjes së dy vajzave të tjera dhe sipas specialistëve mjeko-ligjorë ka disa fakte që të çojnë në përfundimin se ato mund të jenë mbytur.
Tre fëmijët e çiftit Daskalakis-Pispirigou kanë humbur jetën Malena 3 vjeç e gjysëm në korrik 2019, Irida 6 muajshe në mars 2021 dhe Xhorxhina 9 vjeç në janar të këtij viti.
