Prokurori i përgjithshëm Olsian Çela, në një prononcim për mediat u ndal tek krimet zgjedhore. Ai tha se prokurorive të rretheve gjyqësore i është ofruar mbështetja për të kryer hetimet e plota dhe profesionale që lidhen me zgjedhjet.
Gjithashtu u shpreh se rastet e krimeve zgjedhore duhet të hetohen në transparencë të plotë dhe rezultatet t’i transmetohen publikut.
“Në lidhje me hetimin e krimeve zgjedhore është kërkuar nga prokuroritë të ketë përgjigje dhe të shpejta në drejtim të këtyre proceseve. E rëndësishme është që hetimet të shoqërohen në proces transparent, që publiku të jetë i qartë, e të ketë informacion të plotë në atë ç`ka bërë Prokuroria. Duhet të jemi të besueshëm dhe integritetin e prokurorëve dhe prokurorisë. Çështja e zgjedhjeve është çështje që prek shumë prokurori të rretheve gjyqësore dhe kanë impakt në të gjithë vendin, ndaj rezultati i çdo hetimi, është i rëndësishëm. Rëndësi ka që hetimet të jenë të plota, të kryhen në kohën e duhur dhe rezultatet t’i përcillen publikut. Ne jemi drejtuar disa herë prokurorive të rretheve gjyqësore, i është ofruar mbështetja për të kryer hetimet e plota dhe profesionale që lidhen me zgjedhjet”, u shpreh Çela.
