Ish-deputeti Astrit Patozi komenton zgjedhjen e tetë prokurorëve të parë të Prokurorisë Speciale, ditën e sotme. Përmes një postimi në “Facebook”, Patozi shkruan se nuk është nevoja që politikanët të zihen se kush e do më shumë SPAK.
Sipas tij, është njëlloj si të bësh garë se kush është më i zoti për t’i shpallur dashurinë një roboti apo kompjuteri, më shpresën se ai mund të ketë ndjeshmërinë për të zgjedhur atë që do më shumë.
“Në të gjitha rastet, shkruan Patozi, përfundimi do të ishte më keq se te legjenda e Homerit, kur Polifemi i tha Odiseut se si shpërblim për nderin do ta hante atë të fundit, pasi të kishte mbaruar punë me gjithë të tjerët”.
Mesazhi i Patozit:
NUK KA NEVOJË TË ZIHEMI SE CILI E DO MË SHUMË SPAK-un. Nuk ka nevojë fare të zihemi me njëri-tjetrin, se kush është gëzuar më shumë sot për ngritjen më në fund të SPAK-ut. Nuk ka shumë vlerë se cili e deshi më shumë në fillim, cili e tradhtoi rrugës dhe cili i mbeti besnik deri në fund krijimit të kësaj strukture të posaçme për goditjen e korrupsionit të niveleve të larta në Shqipëri.
Sepse është njësoj si të bësh garë se kush është më i zoti për t’i shpallur dashurinë një roboti apo kompjuteri, me shpresën se ai mund të ketë ndjeshmërinë për të zgjedhur pastaj atë që e do më shumë, në varësi të shprehjeve të ndjenjës.
Në të gjitha rastet përfundimi do të ishte më keq se tek legjenda e Homerit, kur Polifemi i tha Odiseut se si shpërblim për nderin do ta hante atë të fundit, pasi të kishte mbaruar punë me gjithë të tjerët. Ndaj edhe sot do të mjaftonte një mbështetje e heshtur, pa por…dhe sigurisht pa kushte. Me krahë të lehta SPAK-ut!
