Nis sot zyrtarisht fushata elektorale e zgjedhjeve lokale të 14 majit. Ndonëse partitë kanë më shumë se një muaj që prezantojnë kandidatët, sot pritet të mbahet çelja zyrtare e fushatës, pasi gjatë takimeve do t’u lejohet që të prezantojnë dhe numrin që kanë në fletën e votimit përpara qytetarëve.
Kjo vjen një ditë pas mbledhjes së Komisionit Qendror të Zgjedhjeve ku u caktua renditja e partive, për kandidatët për kryebashkiakë dhe për kandidatët për këshilltarë bashkiakë.
Presidenti Bajram Begaj, një ditë më parë priti në takim krerët e institucioneve dhe përfaqësuesen e organizatës ndërkombëtare për monitorimin e zgjedhjeve, OSBE-ODIHR, Audrey Glover.
Përmes një mesazhi, Begaj kërkoi që të zbatohet ligji si dhe të dënohet çdo fenomen që mund të cenojë procesin zgjedhor, si shit-blerja e votave apo keqpërdorimi i fondeve.
