pSara Gjordeni, ish-missi shqiptar dhe një nga fytyrat më të njohura të ekranit, ka rrëfyer pasditen e sotme në emisionin “Ftesë në 5” detaje të pathëna më parë për jetën personale dhe profesionale.
Në një intervistë të ndjerë, ajo zbuloi se shumë shpejt do të rikthehet në televizion me një projekt të ri – një emision që do të dokumentojë emocionin e zbulimit të gjinisë së foshnjës tek gratë shtatzëna. Programi titullohet “Vajzë apo djalë” dhe sipas Sarës, ishte ideja unike që e bindi ta pranonte këtë sfidë televizive.
“Ky program është i ndryshëm nga çdo gjë që është bërë më parë. E mora si një shenjë, sepse në ditët që sapo kisha marrë vesh që isha në pritje të një vajze, më erdhi edhe propozimi për këtë format,” – tregoi ajo.
Por ajo që mori më shumë vëmendje në rrjet ishte zgjedhja e Sarës për të mbajtur hijab pas martesës me këngëtarin Bardhi Idrizi. Mbulimi i saj, për një katolike të lindur dhe rritur në Shqipëri, shkaktoi debate dhe komente të shumta në rrjetet sociale.
“E kam bërë për të plotësuar një dëshirë të partnerit tim. Por mbi të gjitha jemi të dy tolerantë, aspak ekstremistë. Kemi respekt për besimet dhe zgjedhjet e njëri-tjetrit,” – u shpreh ajo.
Në fund, Sara tregoi se vajza e saj, Nea, është një “kopje e vogël” e saj dhe i ka sjellë një dimension të ri lumturie në jetë.
Përmes këtij rrëfimi, Sara Gjordeni thyen heshtjen dhe përcjell një mesazh për respektin ndaj zgjedhjeve personale, pavarësisht paragjykimeve që mund të vijnë nga jashtë.
