Një incident i pazakontë shënoi ndeshjen e futbollit mes West Ham dhe Chelsea për Kampionatin anglez të femrave, me protagoniste transferimin e ri të “Çekanëve”, Estelle Cascarino – dhe vathët e saj. Lojtarja franceze, e huazuar te West Ham vetëm tre ditë para ndeshjes, pa debutimin e saj të shtyhej për një arsye të rrallë. Teksa ishte gati të hynte në fushë në fillim të pjesës së dytë, arbitrat i bënë të qartë se nuk mund të aktivizohej pa hequr vathin.
Edhe pse veshi i saj ishte i mbuluar me shirit ngjitës, rregullorja e Federatës Angleze (FA) ndalon kategorikisht mbajtjen e bizhuterive nga lojtarët, edhe nëse ato janë të mbuluara. Cascarino shpjegoi se ka një piercing të brendshëm, i cili nuk mund të hiqet lehtë dhe kërkon ndërhyrje mjekësore, çka solli vonesa dhe detyroi lojtarën të rikthehej në stol, dukshëm e zhgënjyer.
Për disa minuta, West Ham e nisi pjesën e dytë me dhjetë lojtare, deri në momentin kur Ines Bellumu u rikthye në fushë për t’u zëvendësuar. Pas ndeshjes, trajnerja e re e West Ham, Rita Guarino, shprehu hapur pakënaqësinë e saj, duke theksuar se Cascarino kishte luajtur më parë në Ligën e Kampionëve me veshin të mbuluar me shirit. Guarino e cilësoi zbatimin e rregullores në këtë rast si të tepruar, duke nënvizuar se incidenti ndikoi negativisht në rrjedhën e lojës dhe në debutimin e lojtares së re.
