*Shikoni shumat marramendëse për këngëtarët në fundvit

Kanë punuar shumë e kanë rritur kërkesat. Sidomos kur bëhet fjalë për natën më të shtrenjtë të vitit, atë të ndërrimit të viteve, që ndryshe në pazarin e mbrëmjeve dhe atyre që merren me këtë biznes, quhet “nata e parë”.

Reperi Noizy, i cili do të këndojë në Tiranë, e ka të rezervuar dhe do të fusë në xhep 20 mijë euro në natën e ndërrimit të viteve. Ndërsa kur bëhet fjalë për të kënduar “live”, një tjetër artist super i kërkuar është edhe Sinan Vllasaliu.

Panorama shkruan sot se, ai në datën e parë të Vitit të Ri do të fitojë vetëm për një natë 12 mijë euro, në Schlieren, në Zurich të Zvicrës, ku është i ftuar në një prej koncerteve më të mëdhenj dhe më të shtrenjtë të fundvitit nga “Mega event”. E po në këtë koncert do të jetë edhe një tjetër artiste shumë e kërkuar, siç është Gjyste Vulaj. Këngëtarja në dy ditët e para të vitit do të fitojë 20 mijë euro.

Por, në mesin e atyre më të paguarve është edhe këngëtari Gena, me 12 mijë euro për natën e Vitit të Ri, e po me këtë shifër është edhe Rovena Stefa, e cila do të jetë në Amerikë me një marrëveshje që ka bërë. Në Amerikë mësojmë se do të jetë edhe artistja Artiola Toska, e cila hyn në kalibrin e këngëtareve më të kërkuara apo reperi Gold Ag për herë të parë do të këndojë për shqiptarët e Amerikës. Dhe flitet se shuma që do të fitojë për një natë mund të jetë 10 mijë euro.

Po ashtu edhe këngëtarja Enca Haxhiaj ka çmimin e saj për fundvit. Ne mësojmë se do të jetë në ndërrimin e viteve në Zurich dhe do të fusë në llogarinë e saj hiç më pak se 5 mijë euro. Përveç këngëtarëve, edhe humoristët e njohur si “Stupcat” kanë një shumë të madhe në tri netët e Vitit të Ri. Ata do të jenë në të njëjtin vend ku do të këndojë Sinan Vllasaliu dhe Gjyste Vulaj, dhe do të fitojnë për këto net 15 mijë euro.

Një shifër të madhe do ketë edhe për këngëtarin Labinot Tahiri që për tri netët e shtrenjta të vitit merr jo më pak se 40 mijë euro.

Lista e pagesave

1.Noizy 20 mijë euro

2.Sinan Vllasaliu 12 mijë euro

3.Gjyste Vulaj (2 ditë) 20 mijë euro

4.Labinot Tahiri (3 net) 40 mijë euro

5.Rovena Stefa 12 mijë euro

6.Gena 12 mijë euro

7.Enca Haxhia 10 mijë euro

8.Gold Ag 10 mijë euro