Zëvendëskryetari i Këshillit të Sigurisë së Rusisë, Dmitry Medvedev, ka lëshuar kërcënime të reja, duke deklaruar se përdorimi i armëve bërthamore kundër objektivave në Ukrainë, si dhe një sulm i mundshëm ndaj Mbretërisë së Bashkuar dhe Francës, do të ishte “i ligjshëm dhe i justifikuar” nëse këto vende transferojnë teknologji bërthamore në Kiev.
Në një postim në platformën ruse Max, Medvedev tha se çdo transferim i drejtpërdrejtë i armëve bërthamore në një vend në luftë do të “ndryshonte rrënjësisht situatën”. Ai theksoi: “Nuk ka dyshim se, në një zhvillim të tillë, Rusia do të detyrohet të përdorë çdo armë bërthamore, përfshirë armët jo-strategjike, kundër objektivave në Ukrainë që përbëjnë një kërcënim për vendin tonë. Dhe, nëse është e nevojshme, kundër vendeve furnizuese që do të bëhen pjesëmarrëse në një konflikt bërthamor me Rusinë.”
Nga ana e tij, zëdhënësi i Kremlinit, Dmitry Peskov, tha se informacioni mbi planet e supozuara të Britanisë dhe Francës për transferimin e armëve bërthamore në Ukrainë do të merret parasysh në bisedimet për zgjidhjen e konfliktit. Ai e cilësoi këtë informacion si “potencialisht jashtëzakonisht të rrezikshëm” dhe e quajti një “shkelje flagrante të të gjitha normave dhe parimeve të së drejtës ndërkombëtare”.
Sipas Shërbimit të Inteligjencës së Jashtme të Rusisë (SVR), vendet perëndimore po shqyrtojnë mundësinë e transferimit të një bombe bërthamore ose të një bombe “të ndyrë” në Kiev, duke përdorur dërgesa sekrete të komponentëve dhe teknologjisë evropiane për ta bërë të duket se Ukraina e zhvilloi armën në mënyrë autonome. Megjithatë, shërbimet e inteligjencës ruse pretendojnë se Britania dhe Franca “shpresojnë më kot” të shmangin përgjegjësinë, pasi çdo informacion sekret herët a vonë zbulohet.
Ky paralajmërim i Medvedev vjen në një klimë të tensionuar ndërkombëtare dhe rrit shqetësimet për një përshkallëzim të mundshëm bërthamor në konfliktin Ukrainë-Rusi.
