Pas 10 muajsh debatesh riatdhesimi i kompanive call center është bërë fakt i kryer.
Prej 1 prillit, ai shtrin fuqinë e tij dhe rrezikon edhe bizneset e këtij sektorit që operojnë në Shqipëri. Siguria se sipërmarrësit italianë të këtij sektori në vendin tonë nuk do prekeshin u dha nga ministrja e Zhvillimit Ekonomik, por homologu në shtetin fqinj i dha kësaj çështjeje goditjen finale, duke ofruar subvencion për bizneset që kthehen të operojnë në vendet e BE-së.
Egli Haxhiraj, Avokat Këshillimi i Sipëmarrësve Italianë: Do të ishte mirë që edhe qeveria shqiptare të përgjigjej me një strategji të përbashkët midis operatorëve dhe shoqatës së call centerave dhe vetë biznesmenëve italiane për të marrë masa që të reduktojë efektet negative të këtij ligji dhe zbatimit te tij në Shqipëri.
Përfaqësuesi i Comfini Industria Italia në Shqipëri, Roberto Caparrota thotë se 97% e këtyre bizneseve duke filluar nga 1 prilli deri në 6 muaj do të mbyllen.
Roberto Caparrota: Po merren masa për të ikur dhe të kthehen në Itali. Në fillim të gjitha ishin të fokusuara në Rumani, por fakti që ministri i Zhvillimit Ekonomik është gati të japë subvencionet e call centerave mendoj se shumica do vazhdojë në Itali.
Përgjegjësine për zbatimin e këtij ligjit, qeveria italiane ia ka ngarkuar kompanive të mëdha të telekomunikacionit, sigurimeve apo bankave që ofrojnë shërbime për operatorët e call center. Por duket se efektet e këtyre nismave të qeverisë italiane kanë filluar të ndjehen në Shqipëri.
Roberto Caparrota: Telecom Italia nga data 20 mars tërhiqet nga Shqipëria.
Ndërkohë sipërmarrësit e call center janë mbledhur këtë të enjte për të diskutuar pasojat që ata do të kenë nga ligji si edhe për të dakordësuar një propozim për shtetin shqiptar, i cili deri më tani ende nuk ka reaguar për 25 mijë vendet e punës që rrezikohen. /Ora News
