Në këtë fund marsi, Orkestra e Harqeve Durrës i dhuroi artdashësve durrsake një mbrëmje të veçantë nën shoqërinë e tingujve të muzikës klasike.
Nën drejtimin e dirigjentit Gridi Kraja, me soliste violinisten Laura Llozi dhe nën udhëheqjen artistike të mezzo-sopranos Olta Juba, orkestra solli për të gjithë adhuruesit e muzikës klasike, koncertin me pjesë nga kompozitorë të shquar si Jenkins, Tchaikovsky, Williams, Sviridov, Gjon Simoni etj.
Para nisjes së koncertit, drejtoresha e Qendrës Kulturore, Alketa Tragaj tha:
“Sonte, me zemën plot mirënjohje dhe respekt, dëshiroj të shpreh falënderimet e mia më të sinqerta për këtë orkestër të mrekullueshme, e cila do të na dhurojë një udhëtim magjik në botën e muzikës.
Me talentin, përkushtimin dhe harmoninë e tyre, këta muzikantë nuk do të na ofrojnë vetëm tinguj të bukur, por edhe emocione të thella që prekin shpirtin e çdo dëgjuesi. Çdo notë e luajtur, çdo melodi e ndjerë, ka qenë një dëshmi e pasionit dhe punës së palodhur që qëndron pas kësaj performance të shkëlqyer.
Një falënderim i veçantë shkon për dirigjentin Gridi Kraja dhe solisten Laura Llozi dhe të gjithë ata që kanë kontribuar në suksesin e kësaj orkestre. Falë jush, arti muzikor vazhdon të lulëzojë dhe të frymëzojë breza të tërë.”
Për rreth një orë, të pranishmit në sallën e teatrit “Aleksandër Moisiu” admiruan disa nga pjesët më të mira të repertorit të kompozitorëve të huaj dhe shqiptarë dhe duartrokitën virtuozitetin e treguar nga instrumentistët e Orkestrës së Harqeve.
