Pesë javë para zgjedhjeve parlamentare të 11 majit, një delegacion i Misionit të Vëzhgimit të Zgjedhjeve të OSBE/ODIHR zhvilloi sot një takim në Komisionin Qendror të Zgjedhjeve.
Delegacioni, i kryesuar nga ambasadori Lamberto Zanier, u njoh me përgatitjet për zgjedhjet, procesin e regjistrimit dhe votimin nga jashtë. Në një deklaratë për mediat, KQZ bëri të ditur se gjatë takimit u diskutua edhe për masat që synojnë garantimin e integritetit të procesit dhe transparencën në administrimin zgjedhor.
“Informuam me hollësi mbi përpjekjet institucionale në bashkëpunim me SPAK dhe Prokurorinë e Përgjithshme për të luftuar krimet zgjedhore dhe për të shmangur përdorimin e burimeve shtetërore në fushatë”, theksoi KQZ.
Misioni i OSBE/ODIHR zhvilloi gjithashtu takime me trupat e tjera të KQZ-së, përfshirë Komisionin Rregullator dhe Komisionin e Ankimimeve dhe Sanksioneve, me qëllim sigurimin e një vëzhgimi të plotë dhe gjithëpërfshirës të procesit zgjedhor.
