Sean “Diddy” Combs është përfshirë në një tjetër padi ligjore, ku akuzohet për një incident të dhunshëm në vitin 2016. Sipas raportimeve të TMZ, producenti i njohur është akuzuar për sulm seksual nga Bryana “Bana” Bongolan, e cila ka dorëzuar padinë në Gjykatën Supreme të Los Angeles këtë javë.
Në dokumentet e gjykatës, Bongolan pretendon se ngjarja ka ndodhur në banesën e atëhershmes së Combs, këngëtares Cassie Ventura. Ajo thotë se Combs kishte ardhur një natë vonë në apartament dhe kishte nisur ta prekë pa pëlqimin e saj. Kur Bongolan refuzoi, ajo pretendon se Combs e kapi dhe e mbajti të varur mbi ballkonin e katit të 17-të.
Sipas padisë, Combs më pas e tërhoqi mbrapsht dhe e sulmoi fizikisht, duke e përplasur mbi mobiljet e ballkonit. Për këtë ngjarje, Bongolan kërkon 10 milionë dollarë dëmshpërblim nga artisti dhe producenti i njohur.
Zëdhënësi i Combs ka mohuar akuzat, duke i cilësuar të pabaza. “Z. Combs mohon me forcë këto akuza serioze dhe mbetet i bindur se e vërteta do të dalë në dritë. Ai ka besim të palëkundur në faktet dhe në drejtësinë e procesit gjyqësor,” thuhet në deklaratë.
Ky rast vjen ndërsa Combs vazhdon të qëndrojë në paraburgim në Metropolitan Detention Center në Brooklyn, pas arrestimit të tij në shtator për trafikim seksual, organizatë kriminale dhe transport për qëllime prostitucioni. Gjatë kësaj jave, ai u refuzua për herë të tretë për lirim me kusht, pasi prokurorët argumentuan se paraqet një rrezik për viktimat nëse lirohet para gjyqit.
Data e gjyqit për Combs është caktuar për 5 maj.
