Cristiano Ronaldo ka lënë të kuptohet se ai është afër pensionimit pas golit të fundit për Al-Nassr.

Ronaldo, 39 vjeç, është një nga futbollistët më të mëdhenj që ka luajtur ndonjëherë këtë lojë, me superyllin portugez që ka shënuar 904 gola në karrierë.

Sulmuesi ka përfaqësuar ekipe si Sporting, Manchester United, Real Madrid dhe Juventus, ndërsa ka shënuar gjithashtu 132 gola në 214 paraqitje për Portugalinë.

Ronaldo – i cili gjithashtu ka fituar Topin e Artë pesë herë, tani luan për skuadrën e Arabisë Saudite Al-Nassr ku ka regjistruar 64 gola dhe 17 asistime në vetëm 71 ndeshje.

Goditja e tij e fundit erdhi të hënën mbrëma pasi Al-Nassr mundi skuadrën e Katarit, Al-Rayyan 2-1 në ndeshjen e tyre të dytë të AFC Champions League këtë sezon.

Pas ndeshjes veterani pohoi se është afër uljes së perdes së karrierës së tij dhe këmbënguli se nuk është i fokusuar në fitimin e vlerësimeve individuale.

“Tani po më pëlqen të luaj futboll, pasi e di që nuk kam shumë kohë në fushë. Unë jap gjithçka, 40, 41, nuk ka rëndësi. Unë jap trupin tim për 25 vite futboll dhe nuk mund të jap më shumë sepse mosha nuk të lejon të shkoj më tej”, tha Ronaldo.