2korrik 2015 – Akulli që shërbehet në lokalet e Tiranës është i ndotur me fekale. Emisioni “Fiks Fare” publikoi rezultatet e mostrave të marra nga uji që merret për ngrirje. Në bashkëpunim me Institutin e Shëndetit Publik dhe Inspektoratin Shëndetësor Shtetëror u morën mostrat e akullit në disa subjekte private “bar-kafe”, të përzgjedhura rastësisht. Sipas Top-Channel, mostrat u dërguan më pas për analiza, e pas marrjes së përgjigjeve u konstatua se, në disa subjekte, akulli i marrë ishte i ndotur mikrobiologjikisht. Konkretisht, akulli shfaqte shenja të “Steptokokut fekal”, gjë që tregon se, uji që është shndërruar në akull ka shenja të ujërave të zeza.
Tre nga 7 subjektet, ku u morën mostrat e akullit, shfaqnin këtë problematikë. Dy institucionet kompetente, në ditët në vijim do të marrin masa ndaj subjekteve të gjetura në shkelje, por gjithashtu do të bëhen vëzhgime edhe në subjekte të tjera, për të parë sesi rezultojnë ato.
