Paulo Dybala po kalon një moment të shkëlqyer tek Roma, por ardhmja e tij mund të jetë në Spanjë.
Gazeta katalanase ‘Sport’, shkruan se sulmuesi argjentinas i është ofruar Barcelonës për sezonin e ardhshëm.
Playmakeri argjentinas ka një klauzolë lirimi prej 12 milionë eurosh për skuadrat jashtë Italisë dhe kjo shifër nuk është problem për Barcelonën, pavarësisht problemeve financiare.
Prioriteti i Dybala-s, do të ishte të luante në Spanjë pavarësisht se ka disa oferta nga Premier League.
“Në Angli, West Ham tregoi interes për pagën e tij për shkak të klauzolës së tij të ulët dhe Atletico Madrid gjithashtu pyeti për situatën e tij. Muajt e ardhshëm do të jenë vendimtarë, edhe nëse Roma do të donte ta mbante atë duke rritur pagën e tij. Megjithatë, 30-vjeçari dhe agjenti i tij janë të gatshëm të dëgjojnë çdo ofertë nga jashtë Italisë”, shkruan gazeta Sport.
Drejtori sportiv i Barcelonës, Deco e ka vendosur emrin e argjentinasit në listën e ngushtë për merkaton e verës.
Ai dëshiron të përfitoj nga fakti se e ardhmja e tij me verdhekuqt mbetet e panjohur, veçanërisht nëse Roma nuk arrin të kualifikohet në Champions League dhe është në përfundim të kontratës.
Aspekti që bën të mundur negocimin është fakti se trajneri Xavi, i cili e kishte refuzuar duke e konsideruar “të mbivlerësuar dhe të panevojshëm për nevojat e skuadrës”, nuk do të jetë më trajner i Barcelonës sezonin e ardhshëm.
