Partia Demokratike reagoi përmes deputetit Bardh Spahia për atë që e quajnë një skandal të Edi Ramës.
Sipas PD-së, Rama po vjedh të dhënave personale të qytetarëve shqiptarë për manipulimin e zgjedhjeve të ardhshme.
Spahia u shpreh se Partia Demokratike disponon dhe po publikon dokumentet që provojnë se nuk është vetëm Ministria e Arsimit që urdhëron mësuesit t’u marrin prindërve të dhënat personale, numrin e kartës së identitetit, telefonit dhe email.
Po ashtu edhe ministria e Shëndetësisë ka shpërndarë një email të njëjtë me atë te Ministrisë së Arsimit, ku urdhëron mjekët të mbledhin të dhënat personale të pacientëve në qendrat shëndetësore.
Deklarata e PD:
Skandali këtë herë është i provuar së shkon deri në zyrën e Edi Ramës, pasi në emailin e shpërndarë nga Ministria e Shëndetësisë thuhet se “plotësimi i bazës së të dhënave me informacionet private të pacientëve bëhet sipas kërkesës së ardhur nga Zyra e Kryeministrit”.
Njësoj si në rastin e Ministrisë se Arsimit, edhe këtu kërkohet që operacioni të kryhet me urgjencë dhe Ministria e Shëndetësisë t’i disponojë të dhënat brenda këtij muaji.
Urdhri i Edi Ramës, Ogerta Manastirliut dhe Lindita Nikollës shkel haptazi Kushtetutën dhe disa ligje të tjera që mbrojnë nxënësit, pacientët dhe të dhënat personale te qytetarëve. Ky i fundit ndalon rreptësisht përdorimin apo përpunimin e tyre pa ditur qëllimin dhe pa marrë pëlqimin e individit të cilit i përkasin të dhënat.
Pika 4 e urdhrit të Edi Ramës është me skandalozja e te gjithave! Njeriu që bërtet se po bën shtet, ka kërkuar marrjen e informacioneve private nga regjistrat e pacientëve që janë vizituar në spitale nga Janari deri në Prill, pa dijeninë e tyre, pa pëlqimin e tyre, kundër interesit të pacientëve!
PD i kërkon Komisionerit për Mbrojtjen e të dhënave personale që të ndërhyjë menjëherë për të nxjerrë para drejtësisë shkelësit e ligjit.
PD i kërkon Prokurorisë të mos bëhet palë me heshtjen e saj, por të nisë sa më parë hetimin e skandalit të marrjes së paligjshme të të dhënave personale të pacientëve dhe prindërve të nxënësve, skandal që buron nga zyra e Edi Ramës me qëllimin e vetëm: manipulimin e zgjedhjeve dhe mbajtjen e pushtetit të inkriminuar e të korruptuar me çdo formë të paligjshme dhe antikushtetuese!
PD u bën thirrje mjekëve dhe stafeve të qendrave shëndetësore të mos i përgjigjen urdhrit të paligjshëm të Kryeministrit dhe Ministres së Shëndetësisë! Ata që kanë urdhëruar dhe ata që zbatojnë urdhrin në shkelje të ligjit, duke ekspozuar të dhënat personale të të sëmurëve, do të përballen me drejtësinë!
