Tiranë, 29 gusht 2014 – Partia Demokratike ka denoncuar një tjetër rast, që sipas saj, tregon punësimin e personave të dyshimtë nga kjo mazhorancë.
Zëdhënësja Silvi Bardhi ka thënë se një person i ndaluar për nxjerrje të parave të krimit, është emëruar kontrollor në Rinas.
“Në vitin 2009, Erjon Bojaxhi u ndalua nga policia në Rinas pasi po tentonte të nxirrte nga Shqipëria 200 mijë euro, 101 mijë korona norvegjeze dhe 20 mijë dollarë.
Një sasi e madhe parash me burim kriminal, e cila nuk mund të transferohej në llogari të sigurta jashtë përmes bankave.
Bojaxhi ishte një korrier që e bënte shpesh këtë punë.
Çfarë mendoni se ka ndodhur me të arrestuarin nga policia në vitin 2009 në Rinas me këtë shumë të madhe parash?
Me Edi Ramën, ai është bërë kontrollor në Rinas.
Përtej imagjinatës më djallëzore, rilindja ka caktuar si monitorues në Rinas, një person që dikur Rinasin e shfrytëzonte për të kaluar paratë e krimit, të korrupsionit, apo të burimeve të tjera të paligjshme”, tha Bardhi.
Sipas saj, ky fakt tregon se kë po punëson kjo mazhorancë:
“Sa më e errët, problematike, e kriminale e shkuara, aq më e sigurtë e ardhmja me këtë qeveri, me këtë kryeministër.
Ky është një nga rastet e shumta që rrëzon propagandën e zmadhuar por boshe të Edi Ramës, për meritën, shanset e barabarta.
Çfarë do t’u thotë ai të rinjve të vendit, por edhe të rinjve socialistë, që kanë nevojë për punë.
Mos u lodhni kot për tu bërë profesionistë, se vendet janë zënë nga zanatçinjtë e krimit”.
/agjencia e lajmeve "Dyrrah"/
