Deputeti i PD, Tritan Shehu i ka bërë thirrje presidentit Ilir Meta që të bllokojë perzgjedhjen e ambasadorëve shqiptarë në botë mbi baza politike, partiake apo subjektivizmi personal. Përmes një postimi në Facebook, duke iu referuar seancës dëgjimore në Komisionin e Jashtëm me katër kandidatët për ambasadorë, Tritan Shehu thotë se dy prej tyre nuk i lidhte asgjë me sistemin tonë diplomatik.
“Keshtu vecse shkaterrohet Trupa Diplomatike shqiptare.
Sot nga kater ambasadore, qe u diskutuan ne Komisionin e Jashtem te Kuvendit, dy prej tyre nuk i lidhte asgje me Sistemin tone Diplomatik.
Pa dyshim dicka e tille eshte e pa justifikuar ne vitin 2018, kur diplomacia jone eshte rritur, profesionalizuar e ka ne perberje shume diplomate te niveleve te ndryshme me pervoje e aftesi. Nje politike e tille klienteliste jo vetem qe demton rende cilesine e Sherbimit tone Diplomatik nga vendosja e te tilla emerimeve larg profesionlizmit, por dhe duke demoralizuar e demotivuar diplomatet tane, qe kane vite qe kontribuojne me aftesi e pasion ne kete sektor tejet te rendesishem, duke pritur te shperblehen me karriere. I bej thirrje Presidentit Meta, qe duhet te thote fjalen edhe per keto raste te fundit, te tregohet nje barriere e pa kalueshme ndaj perzgjedhjeve te tilla, mbi baza politike, partiake apo subjektivizmi personal këto”– ka shkruar Tritan Shehu në Facebook.
Kandidatët për ambasadorë shqiptarë, Ilirian Kuka, Rezar Bregu, Riza Poda dhe Virgjil Kule ishin këtë të martë në seancën dëgjimore në Komisionin për Politikën e Jashtme.
1-Ilirian Kuka është kandidat për Ambasador i Jashtëzakonshëm dhe Fuqiplotë i RSH-së në Republikën e Çekisë.
2-Rezar Bregu është kandidat për Ambasador i Jashtëzakonshëm dhe Fuqiplotë i RSH-së në Republikën Federative të Brazilit.
3-Riza Poda është kandidat për Ambasador i Jashtëzakonshëm dhe Fuqiplotë i RSH-së në Republikën e Kroacisë, rezident si dhe Ambasador i Jashtëzakonshëm dhe Fuqiplotë i RSH-së në Bosnjë dhe Hercegovinë, jo rezident.
4-Virgjil Kule është kandidat në postin e kreut të Misionit diplomatik, Ambasador i Jashtëzakonshëm dhe Fuqiplotë i RSH-së në Mbretërinë e Suedisë, rezident si edhe në Republikën e Finlandës, Republikën e Islandës dhe Mbretërinë e Norvegjisë, jo rezident.
