Sot pedagogët hynë në ditën e dytë të bojkotimit të vitit të ri akademik.
Sindikata e Punonjësve të Universiteteve të Shqipërisë në një deklaratë njofton vijimin e protestës edhe në ditët në vijim.
Ndërkohë, SPUSH po zhvillon këtë të martë protestën e paralajmëruar që nga ora 10.00.
Deklarata e plotë:
Të dashur kolegë të IAL-ve publike!
Sindikata e Punonjësve të Universiteteve të Shqipërisë (SPUSH), duke falenderuar stafin akademik dhe ndihmës akademik e administrativ që mbështeti protestën e ditës së parë, deklaron vijimin e protestës edhe në ditët në vijim, në mbështetje të Peticionit të datës 30 Gusht 2022, drejtuar Kryeministrit, Ministres së Arsimit dhe Sporteve dhe rektorëve të IAL-ve publike, në formën e ndërprerjes së plotë të procesit mësimor përgjatë gjithë ditës, si dhe nëpërmjet grumbullimit para fakulteteve në orën 10.00.
Të gjithë Fakultetet e Universitetit Politeknik do ta zhvillojnë protestën e orës 10.00 të qendërzuar para godinës së Korpusit Qendror të UPT-së.
Të dashur kolegë, vetëm vijimi dhe qëndresa jonë e përbashkët do të mundësojnë vlerësimin dhe kthimin e dinjitetit akademik të stafeve dhe universiteteve tona.
Një thirrje të veçantë i bëjmë ndërgjegjes së atyre kolegëve që nuk i janë bashkëngjitur kësaj lëvizje deri tani dhe do e kanë mundësinë të kontribuojnë në ditët në vijim.
Misioni ynë akademik vazhdon!
