Ekipit të futbollit të femrave të Kanadasë i janë zbritur gjashtë pikë nga grupi i tyre në Lojërat Olimpike dhe trajnerja Bev Priestman është pezulluar për një vit pasi një dron u përdor për të spiunuar seancat stërvitore të një ekipi rival.
FIFA njoftoi sanksionet – të cilat përfshijnë një gjobë prej 175,720 £ për Shoqatën Kanadeze të Futbollit (CSA) – një ditë pasi Priestman, e lindur në Angli, u largua si trajnerja kryesore e ekipit olimpik të Kanadasë. Zyrtarët e CSA, Joseph Lombardi dhe Jasmine Mander, gjithashtu janë pezulluar nga FIFA për një vit.
Organizata qeverisëse e futbollit, FIFA, tha se CSA ishte në “shkelje” të parimeve të saj. Priestman është pezulluar nga CSA pas incidentit që pa një dron që fluturonte mbi seancën stërvitore të Zelandës së Re të hënën. Sipas kreut të komitetit olimpik të Kanadasë, 38-vjeçarja “me shumë gjasa” ishte në dijeni të incidentit.
“Zyrtarët u gjetën përgjegjës për sjellje ofenduese dhe shkelje të parimeve të lojës së ndershme në lidhje me përdorimin e dronëve nga ekipi përfaqësues i femrave të CSA në kuadër të turneut të futbollit olimpik”, thuhet në një deklaratë të FIFA-s.
