Mediat e huaja nuk kanë lënë pa komentuar koncertin e Dua Lipës në Tiranë mbrëmjen e djeshme, ku ylli i muzikës performoi spektaklin e “Future Nostalgia”.

Daily Mail” shkruan se ylli i popit magjepsi fansat e mbledhur në sheshin “Skënderbej” të Tiranës, me aftësitë e saj vokale dhe lëvizjet energjike të kërcimit, teksa prodhoi hitet e saj në 110-vjetorin e Pavarësisë së Shqipërisë.

Performanca e saj e fundit në turneun “Future Nostalgia” erdhi pasi Dua-s iu dha shtetësia shqiptare për rolin e saj në përhapjen e famës së shqiptarëve ndërkombëtarisht përmes muzikës së saj.

Këtë ngjarje ajo e ka shpërndarë me fansat edhe në Instagramin e saj ku ka shkruar: ‘Faleminderit President Bajram Begaj dhe Kryebashkiaku Erion Veliaj për këtë nderim që mora shtetësinë time shqiptare!!’

Media britanike shkruan edhe historinë e emigrimit të këngëtares, ku thuhet se Dua ka lindur në Londër në vitin 1995 nga prindër kosovaro-shqiptarë që ikën nga konflikti dhe paqëndrueshmëria politike në Ballkan. Ajo ndoqi një shkollë të vogël shtetërore fillore dhe shijoi për herë të parë interpretimin ndërsa merrte mësimet e së shtunës në shkollën e njohur botërore Sylvia Young Theatre.

Pasi kaloi disa vite në Prishtinë pasi puna e babait të saj si menaxher marketingu i ktheu ata në vendlindjen e tij në Kosovë, Dua vendosi me guxim të kthehej e vetme në Britaninë e Madhe në moshën 14-vjeçare në ndjekje të ëndrrave të saj për yll të popit.