Deri tani ka përfunduar kategorizimi për çmimet e reja të energjisë elektrike për 2,046 furra buke dhe pastiçeri nga totali i 3,800 subjekteve që operojnë në vend.

Sipas njoftimit të Shoqatës së Bukës, Pastiçerive dhe Brumërave nga totali i abonentëve të sistemuar, në fashën e çmimit të energjisë 7,6 lekë/kWh janë 955 abonentë apo 47% e tyre, në fashën 9,5 lekë/kWh janë 874 abonentë apo 42% dhe në fashën 12 lekë/kWh janë 217 abonentë apo 10%.

“Sipas informimit dhe detyrave qe u vunë procedura e sistemimit do të vazhdojë deri në përfundimin e plotë. Gjatë kësaj procedure do të ketë dhe riverifikime me grup të nxjerrë direkt nga Drejtoria Qendrore e FSHU-së në mënyrë që çdo abonent të sistemohet në fashën përkatëse”, njofton Shoqata e Bukës, Pastiçerive dhe Brumërave.

Në total në shkallë vendi sipas dhënave të Shoqatës së Bukës, Pastiçerive dhe Brumërave Gëzim Peshkopia janë rreth 3,800 furra bukë.

Procesi i verifikimit në terren për ndarjen e subjekteve në 3 kategori nisi më 7 Maj. Deri në 20 Maj, furrat e bukës dhe pastiçeritë plotësuan formularin e shpërndarë nga Furnizuesi i Shërbimit Universal (FSHU) për kushtet konkrete se në cilën fashë të energjisë elektrike përfshihen. Plotësimi i formularit i parapriu zbatimit të vendimit të ERE-s të miratuar në 15 Prill 2024, për ndarjen e çmimit të energjisë elektrike në 3 fasha, sipas kategorizimit të bizneseve të prodhimit të bukës.

Faturimet më çmimet e reja të energjisë nisën nga 1 Maj 2024 dhe do të zbatohen deri në 31 dhjetor 2024.

Sipas vendimit të miratuar në 2018 nga ERE më përpara vetëm furrat e bukës dhe prodhimit të miellit  për tension 0.4 kv paguanin një tarifë të subvencionuar prej 7.6 lekë/kWh. Ndërsa për bizneset të lidhura në tension 0.4 kv tarifa e energjisë është 14 lekë për kWh. Por pavarësisht vendimit të mëparshëm aktualisht të gjitha furrat në vend pavarësisht shërbimeve që ofronin si pastiçeri apo bar-kafe, energjinë e blinin me 7.6 lekë.

Pas ngritjes së një grupi pune dhe konsultimeve të vazhdueshme, Shoqata e Bukës, Pastiçerive dhe Brumërave dhe MIE e OSHEE Group, kanë rënë dakord për tre çmime të ndryshme sipas llojit të aktivitetit që ka subjekti.

Në vendimin e ri të miratuar nga ERE për kategorinë e parë ku përfshihen “Vetëm Furra buke/prodhim mielli” çmimi i energjisë elektrike do të jetë 7.6 lekë/kWh. Për kategorinë e dytë “Furrë buke, produkte mielli shoqëruese, pastiçeri” çmimi do të jetë 9,5 lekë/kWh dhe për kategorinë e tretë “Furrë buke, produkte mielli shoqëruese, pastiçeri, shërbim Kafe” çmimi do të jetë 12 lekë/kWh./ Monitor