Një tragjedi e re është shmangur në Korenë e Jugut, ku një tjetër avion i linjës ajrore me kosto të ulët “Jeju Air” u detyrua të kthehej në aeroport për shkak të të njëjtit problem me rrotat e uljes. Ky defekt po fajësohet edhe për aksidentin fatal të dy ditëve më parë që kushtoi 179 jetë njerëzish, e po përshkruhet si një prej fatkeqësive më të rënda të aviacionit të vendit.
Njoftimi për incidentin e ri u dha nga agjencia koreano-jugore e lajmeve Yonhap, e cila citoi disa burime. Autoritetet deklaruan se në këtë pikë, do të kryejnë një inspektim të hollësishëm ” të avionëve Boeing 737-800 që u përkasin të gjitha linjave ajrore lokale për të “analizuar në detaje sistemin e mirëmbajtjes”.
“Ne do të shqyrtojmë me kujdes aspekte të tilla si niveli operacional i avionit, të dhënat e inspektimit dhe mirëmbajtja para dhe pas fluturimeve për t`u siguruar që të gjitha rregulloret përkatëse janë duke u respektuar”, – thuhet në deklaratë.
Jeju Air, avioni i të cilit u rrëzua të dielën, opeon gjithsej 39 aeroplanë. Familjarët e shokuar janë mbledhur në aeroportin e Muanit ku presin të marrin trupat e njerëzve të dashur, por edhe kjo nuk është e lehtë.
Zyrtarët vendas thonë se trupat janë dëmtuar keqas, e disa madje nuk janë as të plotë, ndaj po kërkojnë kohë për identifikimin në mënyrë që të sigurohen se nuk do të bëjnë gabime.
Hetimet mbi shkaqet e aksidentit vazhdojnë. Avioni shpërtheu në flakë pasi doli nga pista dhe u përplas në një mur beton. Mjeti u shkatërrua plotësisht dhe vetëm pjesa e bishtit mbeti e dallueshme midis rrënojave.
Ekspertët po shqyrtojnë mundësi të ndryshme rreth asaj që e shkaktoi rrëzimin, duke përfshirë përplasjen me një tufë zogjsh, ndërsa po shihen dhe gjasat që mekanizmi i rrotave të mos ketë funksionuar.
