Pas publikimit të lajmit në gazetën “Shekulli”, se dy drejtorë policë baxhanakë me njëri- tjetrin ishin të implikuar në kultivimin e drogës dhe publikimit të një raporti sekret, ka reaguar policia e shtetit. Policia e Shtetit ka sqaruar opinionin publik se ky lajm është tërësisht i pavërtetë dhe një sajesë e qëllimshme për të cënuar integritetin e policisë dhe punën e saj.
“Theksojmë se është një lajm tërësisht i gënjeshtërt, për raporte të fabrikuara nga redaksi që kanë si synim vetëm përbaltjen e punës së policisë. Një raport i tillë nuk ka egzistuar kurrë e as egziston. Ky lajm i fabrikuar mbi egzistencën e një raporti tërësisht të sajuar, fsheh mbrapa interesa personale, politike dhe kriminale”, – shkruhet në deklaratë.
Më tej Policia e Shtetit shprehet se rezultatet kundër drogës dhe paligjshmërisë dëshmojnë vullnetin dhe angazhimin e Policisë së Shtetit në këtë luftë. Nga ana tjetër, besimi i partnerëve ndërkombëtarë te Policia e Shtetit rikonfirmohet pas çdo operacioni të përbashkët antitrafik.
Ky besim është maksimal, falë rezultateve të përbashkëta dhe intensitetit të punës për luftën kundër kultivimit dhe trafikimit.
Policia e Shtetit bën me dije se mbetet në dispozicion të medias për çdo informacion zyrtar, duke i bërë thirrje të mos raportojë lajme të pavërteta e të sajuara që kanë për qëllim vetëm keqinformimin e publikut.
Gjithashtu Policia e Shtetit ka deklaruar se do të ndjekë rrugën ligjore ndaj kujdo që prodhon , fabrikon dhe sajon shpifje të cilat synojnë prishjen e imazhit të policisë dhe të vendit.
