Policia e Vlorës ka bllokuar ditën e sotme dy skafe që dyshohet se do të përdoreshin për trafik droge. Njëri prej tyre ishte i ndezur, por pa asnjë person në bord.
Bllokimet u bënë në kuadër të operacionit “STUHIA”.
NJOFTIMET E POLICISE
1– Më datë 15.05.2017, rreth orës 11:00, në lagjen “11 Janari” brenda në një ish-magazinë pranë zonës së quajtur “Pusi i Mezinit”, është konstatuar një mjet lundrues tip “Gomone” me gjatësi 7.8 m dhe gjërësi 2.9 m, me 2 motora të markës “Merkuri” dhe “Suzuki”.
Materialet u referuan në Prokurorinë e Shkallës së Parë Vlorë ndaj shtetasit K.Xh., për veprat penale “Mosdeklarimi i zotërimit dhe mbajtjes” dhe “Mungesa e matrikullimit ose regjistrimit”, parashikuar në nenet 23 dhe 24, pika 1 e ligjit 8663, viti 2000 për mjetet lundruese.
2– Më datë 15.05.2017, rreth orës 13:00, në zonën e Dhërmiut, rreth 2.5 milje larg bregut të detit, është konstatuar një mjet lundrues tip “Skaf plastik”, me gjatësi 6 m dhe gjërësi 2.1 m, me 1 motor të markës “Yamaha”, i cili u gjet i ndezur por pa persona në bord.
Materialet u referuan në Prokurorinë e Shkallës së Parë Vlorë, për veprën penale “Mungesa e matrikullimit ose regjistrimit”, neni 24, pika 1 e ligjit 8663, viti 2000 për mjetet lundruese.
Nga hetimet e përbashkëta, dyshohet se dy mjetet lundruese mund të përdoreshin për trafikimin e lëndëve narkotike me destinacion drejt shtetit Italian.
Vijojnë kontrollet e territorit tokësor dhe ujor me qëllim kapjen dhe arrestimin e autorëve përgjegjës në lidhje me këtë veprimtari kriminale.
