Policia e Tiranës ka reaguar për sulmin ndaj ish-kryeministrit Sali Berisha ditën e sotme në protestën e PD.
Policia thotë se autori 31-vjeçar i identifikuar si Gert Shehu, është person me precedentë të mëparshëm për plagosje, prishje të qetësisë publike dhe narkotikë.
Ai, gjithashtu dyshohet se vuan nga çrregullime psikotike për çka trajtohej prej vitesh me ilaçe.
Njoftimi i Policisë:
Në lidhje me incidentin e ndodhur në orën 12:25, në tubimin e organizuar ditën e sotme, gjatë të cilit shtetasi G. Sh. goditi me grusht, deputetin S. Berisha, ju bëjmë me dije se:
Specialistët për Hetimin e Krimeve të DVP Tiranë po kryejnë veprimet procedurale për shtetasin G. Sh., 31 vjeç, banues në Tiranë, për veprën penale “Goditje për shkak të detyrës”.
Nga verifikimet paraprake rezulton se 31-vjeçari ka precedentë të mëparshëm kriminal, për plagosje, prishje të qetësisë publike dhe në fushën e narkotikëve.
Gjithashtu, sipas diagnozës klinike, të vënë në dispozicion nga familjarët e tij, 31-vjeçari vuan nga çrregullime psikotike dhe trajtohej prej vitesh, për këtë.
Hetimet po vijojnë, nën drejtimin e Prokurorisë së Tiranës, për të zbardhur plotësisht rrethanat e ngjarjes.
