Kryeministrja Giorgia Meloni ka fituar titullin e personit më të fuqishëm në Evropë të dhënë nga gazeta “Politico” në renditjen e saj vjetore.
“Kë telefonon nëse dëshiron të flasësh me Evropën? Nëse je Elon Musk, njeriu më i pasur në botë dhe këshilltari kryesor i presidentit të sapozgjedhur të SHBA-së, Donald Trump, numri që duhet të telefonosh është Giorgia Meloni”, kështu e nis shkrimin e saj gazeta amerikane “Politico” për kryeministren italiane.
Media e njohur shkruan se Meloni bëri bujë në mbarë botën kur u bë kryeministrja e parë grua e Italisë, por pak parashikuan se ajo do të qëndronte gjatë në detyrë.
Gjatë dy viteve të fundit Meloni e ka konsoliduar qeverinë e saj si një nga më të qëndrueshmet që ka ekzistuar ndonjëherë në Italinë e pasluftës.
Meloni ka shmangur përplasjet me Brukselin duke habitur gjithashtu kritikët e saj dhe është shfaqur si një nga mbështetëset më të forta të Ukrainës. Në shkrim përmendet edhe lufta e saj kundër emigracionit dhe sjell në vëmendje marrëveshjen e nënshkruar me Shqipërinë.
Ndonëse ngjalli debat në shtetin fqinj dhe hasi në vështirësi ligjore, kjo nuk i pengoi liderët evropianë të shohin me admirim “modelin Meloni “.
Olaf Scholz ka dalë publikisht pro këtij plani, ndërsa kryeministri britanik bëri një vizitë në shtetin fqinj për të mësuar më shumë rreth skemës.
Ajo adhurohet nga miliarderi Musk, një adhurues i politikave të saj të imigracionit, i cili së fundmi i ka dhënë asaj çmimin Global Citizen të Këshillit Atlantik në Nju Jork.
