Presidenti brazilian, Jair Bolsonaro është shprehur se vaksina “Pfizer-BioNTech” mund t’i kthejë njerëzit në krokodilë ose femrat t’i bëjë me mjekër.
Lideri brazilian i ekstremit të djathtë ka qenë skeptik ndaj pandemisë koronavirusit qëkur e quajti atë “një grip i lehtë”, ndërsa këtë javë këmbënguli se nuk do të vaksinohej, edhe pse vendi ka nisur programin e vaksinimit masiv.
“Në kontratën e Pfizer thuhet shumë e qartë: “Ne nuk mbajmë përgjegjësi për ndonjë efekt anësor”. Nëse kthehesh në një krokodil, është problemi yt. Nëse bëheni mbinjerëzorë, nëse një gruaje fillon t’i rritet mjekra ose nëse një burrë fillon të flasë me zë femëror, ata nuk mbajnë përgjegjësi”, tha ai, duke iu referuar prodhuesve të ilaçeve.
Brazili ka regjistruar më shumë se 7.1 milion raste dhe pothuajse 185 000 vdekje nga Covid-19. Vetë Bolsonaro u infektua në korrik, por u shërua brenda tre javësh.
