Princi më i vogël i familjes mbretërore britanike, Louis, ka festuar ditëlindjen e tij të shtatë, dhe prindërit e tij, Princi William dhe Princesha e Uellsit, Kate Middleton, e shënuan këtë moment të veçantë me një fotografi të publikuar në Instagram.
Në imazh, Louis shfaqet i buzëqeshur, ulur mbi një trung peme, me sfond një pyll pranveror që reflekton dashurinë e familjes për natyrën. Ajo që bie menjëherë në sy është një detaj i ëmbël dhe tipik për moshën e tij, mungesa e dhëmbëve të përparmë.
Postimi në Instagram shoqërohet me një mbishkrim të shkurtër: “I urojmë Princit Louis ditëlindje të lumtur për 7-vjetorin e tij!”
Fotografia është realizuar nga Josh Shinner, një nga fotografët e preferuar të familjes mbretërore.
Zgjedhja e sfondit nuk është rastësore, natyra ka marrë një rol të veçantë për familjen mbretërore, veçanërisht pas përballjes së Kate Middleton me një diagnozë të vështirë me kancer.
Në një video emocionale të shpërndarë kohët e fundit, Princesha u shpreh: “Gjatë këtij viti, natyra ka qenë strehë për ne. Këtë Ditë të Nënës, le të festojmë Nënën Natyrë dhe të reflektojmë mbi ndikimin e marrëdhënies sonë me botën natyrore, jo vetëm për shëndetin tonë mendor dhe emocional, por edhe për vetë kuptimin tonë në rrjetin e jetës.”
