Rreth 22 mijë shërbyes civilë në administratën lokale dhe qendrore në Kosovë të martën filluan grevë njëorëshe, duke kërkuar nivelizim të pagave me sektorë të tjerë publikë.
Sindikata e Shërbimit Civil të Kosovës, thotë së shërbyesit civilë ndjehen të diskriminuar dhe nuk trajtohen të barabartë sa i përket nivelit të pagave.
Sipas saj, nëse Qeveria e Kosovës nuk reflekton karshi kërkesave të shërbyesve civilë, greva mund të mbahet gjatë orarit të plotë të punës, nisur nga e mërkura.
Përfaqësuesi i Këshillit Grevist të shërbyesve civilë, Ali Sefaj, thotë se me grevën e tyre, shërbyesit civilë nuk duan të paralizojnë shtetin, por kërkojnë reflektim ndaj kërkesave të tyre.
Paga mesatare e shërbyeseve civilë në Kosovë është 340 euro. Ndërkohë, edhe sistemi i arsimit në vend ka hyrë tashmë në javën ë tretë të grevës, duke kërkuar rritjen e koeficientit të pagës për 30%.
Në grevë për më shumë së një muaj janë edhe mjekët kirurgë në Kosovë. Ligji për pagat është në fazën e shqyrtimit parlamentar, kurse më 31 janar pritet që të procedohet në Kuvend për miratim.
