Në një mbledhje të hapur të zhvilluar paraditen e sotme, senati Akademik i Universitetit "Aleksandër Moisiu" në Durrës (UAMD), ku morën pjesë Këshillat Studentorë dhe studentët e ekselencës, në zbatim të kompetencave që i jep ligji, shprehu njëzëri mbështetjen e plotë për kërkesat e paraqitur nga protesta studentore dhe vendosi:

1. T'i kërkojë Administratorit të Universitetit "Aleksandër Moisiu" Durrës nxjerrjen e kostos në buxhetit për të parë mundësinë e përgjysmimit të tarifave të studimit.

2. Heqjen e menjëhershme të çdo pagese shtesë nga ana e studentëve për tërheqjen e vërtetimeve apo dokumentave të tjera nga Sekretaritë Mësimore.

3. Krahas mbështetjes aktuale, të inkurajojë procedurialisht dhe financiarisht përfshirjen e vazhdueshme të studentëve në kërkimin shkencor brenda dhe jashtë Universitetit "Aleksandër Moisiu" Durrës.

4. Të ftojë Këshillat Studentorë dhe studentët ekselentë në diskutimet për buxhetin e ardhshëm të Universitetit "Aleksandër Moisiu" Durrës, si dhe në çështje të tjera që lidhen me proçesin mësimor dhe arritjen e standardeve më të larta akademike.

5. Për zbatimin e këtij vendimi ngarkohen:

  • Administratori
  • Rektorët
  • Dekanët e Fakulteteve
  • Drejtorët e Drejtorive

6. Ky vendim hyn në fuqi menjëherë.