Protesta/ Rama: Tallje e madhe nga politikanët, TVSH ndaj biznesit të vogël për të kontrolluar të mëdhenjtë

Tallje e madhe me njerëzit nga politikanët pa atdhe, e ka konsideruar Kryeministri Edi Rama uljen e qepenave të tregjeve mesditën e sotme.

Në një postim në rrjetet sociale, Rama thotë se tregjet janë jashtë skemës së TVSH-së dhe biznesi i vogël ka taksa zero.

Sipas Kryeministrit, TVSH-ja ndaj biznesit të vogël është futur për të kontrolluar bizneset e mëdha.

“Protesta e uljes së qepenave në tregjet bashkiake tallje e madhe me njerëzit nga politikanët pa atdhe!Sepse tregjet JANE JASHTE SKEMES së TVSH!Ne bëmë ZERO taksën e Biznesit të Vogël dhe futja në TVSH e të vegjëlve nuk rrit aspak barrën mbi ta po siguron kontrollin e të mëdhenjve”, është reagimi i Kryeministrit Edi Rama.

Bizneset e vogla mbyllën sot aktivitetin tregtar për 60 minuta në shenjë proteste kundër TVSH-së që hyri në fuqi më datë 1 prill. Edhe tregtarët e Durrësit iu bashkuan kësaj proteste duke ulur qepenat e duke deklaruar se ata qeveria do i çojë automatikisht drejt falimentimit.