Partia Demokratike ka akuzuar sot kryeministrin Edi Rama se u kërkon nxënësve të ekselencës të bashkohen me bandën e trafikantëve, tutorëve dhe hajdutëve, duke publikuar disa mesazhe që sipas saj, Rama ua ka dërguar gjimnazistëve. Në një dalje për mediat nga selia blu, deputeti Luçiano Boçi, u bëri thirrje të rinjve ta hedhin në koshin më të afërt të plehrave, këtë përqeshje dhe shantazh të Edi Ramës.
“U kërkon nxënësve më të mirë, të bashkohen me më të zinjtë e vendit. U kërkon të rreshtohen me Roshin e me Bushin, me Ndokën e me Peçin, me Ndonin e me Cubin, me Prengën e me Frrokun, me njerëz pra që si arritje kryesore shënojnë trafikun e drogës, trafikun e qenieve njerëzore, vrasje, grabitje dhe dhunime”, tha Boçi.
