Me moton “Të ecim shtigjeve të Dardanisë”, në Ditën Botërore të Turizmit është bërë hapja e sezonit turistik vjeshtë-dimër.
Përfaqësues të turizmit nga Kosova e Shqipëria, kanë bërë thirrje për vazhdim të fushatës “Pusho shqip”, meqë sipas tyre kështu do të zhvillohet ekonomia dhe do të punësohen qytetarët e vendit.
Ministria e Tregtisë dhe Industrisë ka organizuar “Ditën Botërore të Turizmit”, ku me këtë rast është bërë edhe hapja e sezonit turistik vjeshtë-dimër.
Ky aktivitet është mbajtur në moton “Të ecim shtigjeve të Dardanisë”.
Është bërë e ditur se fuqizimi i turizmit, do të ndikojë drejtpërdrejt në krijimin e vendeve të punës.
Zëvendëskryeministrja Albulena Balaj-Halimaj ka thënë se si qeveri do ta kenë prioritet turizmin në Kosovë.
Më tej, ajo ka thënë se zhvillimi i turizmit sjell fitime ekonomike dhe vende të reja të punës.
Balaj-Halimi ka kërkuar që shqiptarët e Shqipërisë t’i kalojnë pushimet vjeshtë-dimër në Kosovë.
“Sot jemi për të shënuar Ditën Botërore të Turizmit që hap zyrtarisht turizmin në Kosovë pavarësisht gjendjes në të cilën jemi. Ky takim po mbahet pas dy ditë të mbledhjes së dy qeverive tona që u takuam në Tiranë dhe uroj që si ajo ditë që ishte produktive uroj që edhe ky takim të dalë me rezultat të mira. Situata krijon shumë rreziqe për turizmin dhe zhvillimin e turizmit. Zhvillimi i turizmit sjell fitime ekonomik dhe vende të reja të punës. Si qeveri do t’i japim prioritet të veçantë turizmit vjeshtë-dimër në Kosovë”, u shpreh ajo.
Ministri i Tregtisë dhe Industrisë, Vesel Krasniqi, ka thënë se së bashku me ministrin Klosi janë duke u përpjekur që të promovojnë vendet turistike të Kosovës dhe Shqipërisë.
Mes tjerash Krasniqi ka ftuar edhe bizneset që të investojnë në fushën e turizmit në Kosovë dhe Shqipëri.
“Duke parë se turizmi në vendet tona ka potencial të madh për të ju ofruar vizitorëve, ne dy ministrat jemi dakorduar që të bëjmë promovimin e vendeve së bashku. Jemi duke punuar për të krijuar guida për vizitorët. Sektori i turizmit është mjaft i rëndësishëm në vendin tonë dhe unë jam përkushtuar që përmes dikasterit që drejtoj duke rritur buxhetin në fushën e turizmit. I ftoj bizneset nga vendi ynë dhe jashtë që të investoj ë në fushën e turizmit në këto dyja vendet”, tha Krasniqi.
Kurse, ministri i Turizmit dhe Mjedisit të Shqipërisë, Blendi Klosi ka shtuar se kufiri administrativ nuk duhet të jetë problem për promovimin e destinacioneve.
“E kemi thënë shpesh se si turizmi në vendet tona duhet të shndërrohet në një industri e cila çdo ditë mund të ofrojë punësim, dhe në fund të fundit ne kemi shumë nevojë të promovojmë në mënyrë të përbashkët një destinacion që nuk ka arsye të ketë ndarje nga një kufi administrativ. Ky sot dëshmoi se sa të fortë bëhemi kur jemi së bashku”.
Ndërkaq , ambasadori i Shqipërisë në Kosovë, Qemal Minxhozi ka thënë se mbledhja e fundit ndërmjet dy qeverive ka qenë e rëndësishme për fushën e ekonomisë.
“Mbledhja e fundit është e rëndësishme për një bashkëpunim në fushën e ekonomisë. Ka shumë rëndësi që ne të shikojmë për të ardhmen dhe kapacitetet hoteliere”.
Kryetari i Bashkisë së Vlorës, Dritan Leli tha se është radha e shqiptarëve të Shqipërisë të vizitojmë e të bëjnë turizëm mëtanë bjeshkëve.
“Mbledhja e dy qeverive në Shqipëri tregoi edhe një herë që dimë të flasim një gjuhë, dhe të bëjmë punë që shoqëron produkt. Këtë produkt e pres edhe nga ky takim i sotëm”. Ndër të tjera, Departamenti i Turizmit ka prezantuar edhe web-portalin e turizmit.
