Qesharake ajo që ka ndodhur me provimin e gjuhës italiane që dha disa ditë më parë Luis Suarez. Sulmuesi uruguaian, për shkak se partnerja e tij është me origjinë nga Italia, kishte mundësinë të merrte pasaportën e vendit fqinj nëse do të kalonte provimin e gjuhës.
Juventusi e priste në Torino dhe mediat në Itali kanë zbuluar ditë më parë ndërhyrjet e shumta që ishin bërë që Suarez ta merrte provimin pa probleme.
Gjithsesi planet ua janë prishur me nisjen e hetimeve nga Guardia Di Finanzia.Suarez kishte marrë një dokument “pdf” dhe aty kishte se çfarë do të mësonte.
Ai material tani është në duart e hetuesve dhe “Corriere della Sera” ka zbuluar detaje mbi provimin e nivelit B1 që sulmuesi ka dhënë.
Pyetjet e bëra janë elementare, madje në të është edhe “Si quheni”. Ka edhe pyetje të tjera mbi profesionin e tij dhe familjen, apo edhe “na thoni një qytet italian” që përgjigjen e ka “Torino”.
Suarez nuk ka gabuar të shkruajë si i thuhet supermarketit dhe shalqirit në italisht, pasi ka parë fotografitë e tyre në provim. Ah, po, edhe diçka tjetër: Uruguaiani e ka përfunduar provimin për 12 minuta, jo për 2 orë e gjysmë sa zgjat zakonisht.
