Një 40- vjeçar nga Kosova është plagosur teksa ndodhej në ambientet e ajrimit në burgun e Vaqarrit. Sipas policisë, shtetasi Lili Dulaj, është qëlluar me armë zjarri në këmbë nga një person ende i paidentifikuar.
Ai është transportuar menjëherë në Spitalin Ushtarak ku ndodhet jashtë rrezikut për jetën.
Forca të shumta policie kanë mbërritur në institucionin e vuajtjes së dënimit, ndërkohë që po krehin zonën nga ku dyshohet të jetë qëlluar i paraburgosuri.
Autoritetet vijojnë hetimet për zbardhjen e plotë të rrethanave të ngjarjes dhe kapjen e autorit.
