TIRANË, 27 mars 2013 – Qeveria miratoi sot fondin shtesë prej 13 018 800 lekë për dhënie ndihme financiare ndaj familjeve të dëmtuara nga shpërthimi 5 vite më parë në Gërdec. 

Në vendimin e qeverisë specifikohet se paratë do ndahen nga Bashkia Vorë, për banorët që jetojnë me qera për shkak të shkatërrimit të banesave e tokave bujqësore që ndodhen brenda perimetrit të kraterit. 

Vendimi i plotë

“Vendim për akordim fondi shtesë Bashkisë Vorë, për dhënie ndihme financiare familjeve të dëmtuara nga aksidenti teknologjik i datës 15.3.2008 në fshatin Gërdec, për pagesën e qirave të banesave dhe të dëmeve të shkaktuara nga mospërdorimi i tokave e kulturave bujqësore, që ndodhen brenda perimetrit 300 ml rreth kraterit, e shpallur si zonë e sigurisë së lartë. 

Në mbështetje të nenit 100 të Kushtetutës, të neneve 5 e 45, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, të nenit 13, të ligjit nr.119/2012, “Për buxhetin e vitit 2013”, dhe të ligjit nr.8756, datë 26.3.2001, “Për emergjencat civile”, me propozimin e ministrit të Brendshëm, Këshilli i Ministrave 

V E N D O S I : 

1. Bashkisë Vorë, në buxhetin e vitit 2013, t’i akordohet fondi shtesë prej 13 018 800 (trembëdhjetë milionë e tetëmbëdhjetë mijë e tetëqind) lekësh, për dhënie ndihme financiare familjeve të dëmtuara nga aksidenti teknologjik i datës 15.3.2008 në fshatin Gërdec, për pagesën e qirave të banesave dhe të dëmeve të shkaktuara nga mospërdorimi i tokave e kulturave bujqësore, që ndodhen brenda perimetrit 300 ml rreth kraterit, e shpallur si zonë e sigurisë së lartë, për vitet 2011 dhe 2012. 

2. Miratimin e listave të familjeve të bashkisë Vorë, së bashku me shumën përkatëse të kompensimit të dëmeve, sipas lidhjeve 1, 2, 3, bashkëlidhur këtij vendimi. 

3. Fondi i akorduar, prej prej 13 018 800 (trembëdhjetë milionë e tetëmbëdhjetë mijë e tetëqind) lekësh, të përballohet nga fondi rezervë i Këshillit të Ministrave. 

4. Ngarkohen ministri i Financave, ministri i Brendshëm, prefekti i qarkut Tiranë dhe bashkia Vorë, për zbatimin e këtij vendimi. 

Ky vendim hyn në fuqi menjëherë dhe botohet në “Fletoren zyrtare”.