Kryeministri Edi Rama ka zhvilluar një takim me komunitetin shqiptar në Athinë, ku uroi besimtarët myslimanë për Fitër Bajramin dhe foli për mundësitë e rikthimit të emigrantëve në Shqipëri.
“Kush do të ketë kurajon të kthehet sot në Shqipëri, do të ketë më shumë nesër se duke qëndruar këtu. Paga mesatare sot është 830 euro dhe në mandatin e katërt do ta çojmë në 1,000 euro,” deklaroi Rama.
Ai premtoi se pas zgjedhjeve të 11 majit do të rikthehet në Greqi për të falënderuar shqiptarët për mbështetjen në integrimin e vendit në BE. Sipas tij, pas kësaj date, shqiptarët do të jenë “të barabartë mes të barabartëve” në Evropë.
Rama theksoi gjithashtu se Shqipëria ka fituar respektin e ndërkombëtarëve dhe nuk është më “në mëshirën e askujt.” Ai kujtoi vështirësitë ekonomike të vendit në të shkuarën dhe tha se qeveria e tij ka shmangur falimentimin duke riorganizuar financat publike.
