Kryeministri Edi Rama, gjatë një takimi me shqiptarët në Athinë, deklaroi se në mandatin e katërt të qeverisjes, Shqipëria do të arrijë një pagë mesatare prej 1 mijë eurosh në sektorin publik. Rama u shpreh optimist se kjo shifër do të tejkalojë pagën mesatare në Greqi.
Ai theksoi përmirësimet e ekonomisë që kanë ndodhur gjatë kohës së qeverisjes së tij, duke përmendur uljen e kredive të këqija nga 5 përqind, si dhe rritjen e të ardhurave për frymë nga 3200 euro në 10 mijë euro, duke parashikuar një shifër prej 15 mijë eurosh për vitin 2030.
Rama tha:
“Kur ne morëm detyrën, bankat ishin zhytur në kredi të këqija. Ishte një dritë e kuqe që paralajmëronte një rrezik të madh, që shqiptarët e Greqisë e kanë përjetuar në lëkurën e vet. Sot kreditë e këqija janë nën 5 përqind, njësoj si vendet e tjera dhe Shqipëria nuk ka asnjë rrezik. Të ardhurat për frymë janë mbi 10 mijë euro dhe në Shqipërinë 2030 do të jenë 15 mijë euro”.
Kryeministri gjithashtu theksoi se Shqipëria ka bërë përparime të mëdha në përmirësimin e kushteve të jetesës dhe se shqiptarët që janë në Greqi mund të kthehen në Shqipëri me besimin se do të kenë mundësi më të mira se sa ata që kanë aty.
Rama shtoi:
“Ky është lajmi për të gjithë ju që kanë filluar ta shohin Shqipërinë si vendin ku mund të kthehen. Kush ka kurajon të kthehet sot, do të gjejë mundësinë që nesër do të ketë më shumë se këtu”.
