Gjatë një takimi me 61 kandidatët për kryetar bashkie të zgjedhjeve të 30 qershorit, kryeministri Edi Rama është shprehur i vendosur për të bërë zgjedhje edhe pa opozitën dhe madje pa kundërshtarë.
Rama tha se fushata nis më 31 maj dhe objektiv nuk është vetëm fitorja dhe në ato bashki ku nuk ka qeverisur deri tani por kontaktet me qytetarët për të fituar zemrat dhe mendjet e tyre në luftë me fantazmën kërcënuese të së shkuarës.
“Zgjedhjet do të mbahen më 30 qershor. 30 qershori nuk është një datë si gjithë të tjerat por datë e përcaktuar sipas kushtetutës për të dëgjuar popullin sovran për vlerësimin e ofertave elektorale në 61 bashkitë e vendit. Oferta jonë është e plotë, 61 kandidatë dhe kandidate e 61 lista për këshilltarë që do të çelin më 31 maj rrugëtimin drejt 30 qershorit. Në vend të një humbje me nder ku me siguri mund t’i fitonin disa bashki, kundërshtarët zgjodhën qederin. Për shkak të ikjes së tyre nga rruga kushtetuese e zgjedhjeve dhe frikës së tyre për ballafaqimin me ne, në një pjesë të bashkive do ketë vetëm një kandidat por do ketë fushatë intensive si asnjëherë më parë duke nisur nga kontaktet me njerëzit. Do shpenzojmë të gjitha energjitë tona ku do kemi kandidatë përballë. Edhe objektivi jonë është jo thjesht të fitojmë ato bashki por të realizojmë numrin më të madh të kontakteve. Kjo një betejë për të fituar mendjet e zemrat e shqiptarëve në luftë me fantazmën kërcënuese të së shkuarës. Opozita është kthyer në shëmbëlltyrën e asaj fantazme duke sjellë tek shqiptarët hijen e frikës”, deklaroi Rama.
