Raporti holandez ngre alarmin për ndikimin e mediave sociale në shëndetin mendor të fëmijëve 

HOLANDË- Kriza e shëndetit mendor tek fëmijët ka arritur në një pikë kritike, e përkeqësuar nga përhapja e pakontrolluar e mediave sociale.

Sipas një raporti të publikuar sot nga grupi i të drejtave të fëmijëve KidsRight me seli në Amsterdam dhe Universiteti Erasmus në Rotterdam, të paktën 14% e fëmijëve dhe adoleshentëve të moshës 10-19 vjeç në të gjithë botën përjetojnë probleme të shëndetit mendor, me shkallën globale të vetëvrasjeve që arrin 6 për 100,000 adoleshentë të moshës 15-19 vjeç.

“Raporti i këtij viti është një thirrje zgjimi që nuk mund ta injorojmë më”, tha Marc Dulaert, themelues dhe president i KidsRights, në një deklaratë.

Ai theksoi se kriza e shëndetit mendor dhe mirëqenia e fëmijëve ka arritur në një pikë kthese, e përkeqësuar nga përhapja e shfrenuar e platformave të mediave sociale që i japin përparësi angazhimit mbi sigurinë e fëmijëve.

Indeksi KidsRight, një raport vjetor i kryer nga fondacioni, vlerëson shkallën në të cilën 194 vende janë të përkushtuara ndaj të drejtave të fëmijëve dhe shkallën në të cilën vendet po punojnë për të përmirësuar këto të drejta.

Në raportin e saj të vitit 2025, KidsRights identifikoi një “korrelacion shqetësues” midis përkeqësimit të shëndetit mendor të fëmijëve dhe asaj që organizata e quan përdorim problematik të mediave sociale, pra përdorim kompulsiv dhe varësie të mediave sociale që ka një “ndikim negativ” në funksionimin e përditshëm të përdoruesit.

Mungesa e të dhënave mbi shëndetin mendor të fëmijëve është një problem i madh, sipas raportit, dhe zbulon një “nevojë urgjente” për veprime të koordinuara për të adresuar ndikimin e dëmshëm të mjedisit dixhital tek fëmijët dhe adoleshentët.

“Po shohim qeveritë që përpiqen të përmbajnë një krizë dixhitale që po e riformëson në thelb fëmijërinë”, vazhdoi Dulaert, duke bërë thirrje që mirëqenia e fëmijëve të ketë përparësi mbi fitimet e biznesit.

Raporti gjen ndryshime të konsiderueshme rajonale, duke theksuar se Evropa është rajoni ku 13-vjeçarët janë më të ekspozuar ndaj përdorimit problematik të mediave sociale, me 13%, dhe ku niveli i varësisë dixhitale midis 15-vjeçarëve është i pashembullt, me 39% të tyre në kontakt të vazhdueshëm me miqtë e tyre përmes internetit.