Ish-ministrja e Integrimit, Klajda Gjosha ka folur këtë të martë në lidhje me rekomandimin pozitiv të Komisionit Evropian për hapjen e negociatave, një “sinjal” ky që fillimisht duhet të zgjojë qeverinë për nevojën për t’u ulur me këmbë në tokë.

Përmes një deklarate për median, Gjosha tha se është në tagrin e maxhorancës që të ofrojë sigurinë dhe përparimin e nevojshëm në kushtet e vëna nga BE (pesë pikat kyçe), në mënyrë që në muajin qershor, Shqipërisë më në fund t’i hapet rruga për të shkuar drejt familjes evropian.

“Urojmë që ky rekomandim të shërbejë si një zgjim për qeverinë, për tu ulur me këmbë në tokë, dhe për të ofruar rezultate konkrete për të gjithë ata shqiptarë që jetën e tyre kërkojnë ta ndërtojnë jashtë atdheut, për ata profesionistë  që po largohen me shpejtësi, pasi ndihen të pasigurt për rininë që ka humbur shpresën e për të gjithë shtresat në nevojë që janë në kufijtë e mbijetesës”-tha Gjosha.

Deklarata për media e Deputetes së LSI-së, Klajda Gjosha:

Dëshiroj të falenderoj sot në emër të Lëvizjes Socialiste për Integrim, Komisionerin Johannes Hahn, Komisionerin Evropian si dhe Përfaqësuesen e Lartë Frederica Mogherini për Raportin e publikuar pak më parë mbi ecurinë e Shqipërisë për procesin e Integrimit si dhe për rikonfirmimin e Rekomandimit pozitiv për çeljen e negociatave, të cilin Shqipëria e ka marrë në Nëntor të vitit 2016. 

Ky është një lajm i mirë për Shqipërinë dhe për shqiptarët, por në të njëjtën kohë është një detyrim dhe përgjegjësi e madhe për të përmbushur kriteret kyçe të këtij procesi. Ndërkohë që rekomandimi është njëra anë e medaljes, Mbledhja e Këshillit Europian në qershor mbetet një sfidë e madhe për qeverinë shqiptare. Ndaj vullneti i mirë, serioziteti dhe modestia duhet të jenë tiparet që duhet të udhëheqin këtë proces.

Shqipëria sot ndeshet me shumë, sfida, ndërtimin e një shteti të drejte që nuk është peng i asnjë individi apo partie, e që trajton në mënyrë të barabartë të gjithë qytetarët e këtij vendi. Lidhja e politikës me krimin, korrupsioni, pandëshkueshmëria, mosrespektimi i të drejtës së pronës, mbrojtja shtresave në nevojë si dhe ngritja e mekanizmave të kontrollit për lëvizjen e lirë dhe azilkërkuesit janë ende probleme serioze që cënojnë të ardhmen evropiane të Shqipërisë. 

Urojmë që ky rekomandim të shërbejë si një zgjim për qeverinë, për tu ulur me këmbë në tokë, dhe për të ofruar rezultate konkrete për të gjithë ata shqiptarë që jetën e tyre kërkojnë ta ndërtojnë jashtë atdheut, për ata profesionistë  që po largohen me shpejtësi, pasi ndihen të pasigurt për rininë që ka humbur shpresën e për të gjithë shtresat në nevojë që janë në kufijtë e mbijetesës.

Reagimi pozitiv sot nuk vjen as për Qeverinë dhe as për opozitën, ai i takon vetëm qytetarëve shqiptarë që përveç se janë gjeografikisht evropianë, janë evropianë në identitet, në kulturë e në shpirt, ndaj Lëvizja Socialiste për Integrim ka qenë dhe do të jetë gjithmonë përkrah dhe në mbështetje të plotë të këtij procesi jetik për vendin.