Qeveria ka vendosur të rihapë sërish tenderin për parkun industrial të Spitallës në Durrës, duke shfuqizuar vendimin e mëparshëm.

Rihapja e tenderit u bë publike edhe më parë nga ministrja e Ekonomisë, Milva Ekonomi, në një intervistë për Ora Neës. Kështu, qeveria ka vendosur që të rihapë garën për investimin e zonës industriale prej rreth 199 mijë hektarësh.

Tre janë llojet e veprimtarive që do të zhvillohen në këtë zonë:

1. a) prodhuese, industriale dhe agropërpunim;

2. b) tregtare dhe magazinim mallrash;

3. c) shërbime.

Ashtu sikurse është bërë me dije më herët, periudha e shfrytëzimit është 99 vite dhe qiraja e tokës është me çmimin simbolik prej 1 eurosh.

“Përzgjedhja e zhvilluesit të bëhet nëpërmjet procedurës konkurruese”, thuhet në pikën 6 të vendimit të qeverisë, ndërsa fillimisht do të shfrytëzohet një sipërfaqe prej 101.2 hektarë.

Të gjithë investitorët duhet të plotësojnë pesë kritere për përfitimin e tenderit, që janë si më poshtë.

a)  propozimi i projektit teknik;

b)  ndikimi mjedisor;

c)  ndikimi social;

ç)  kohëzgjatja e punimeve;

d) kapaciteti financiar i kompanisë dhe mundësia e financimit të projektit.

Vendimi hyn në fuqi pas botimit në Fletoren Zyrtare, ndërsa Ministria e Zhvillimit Ekonomik, Turizmit, Tregtisë dhe Sipërmarrjes është përgjegjëse për zbatimin e këtij vendimi.