Gripi i shpendëve është rishfaqur duke mbjellë shumë shqetësim në Francë, teksa ka detyruar autoritetet atje ta rrisin nivelin e rrezikut prej sëmundjes nga “i moderuar” në “të lartë”.
Ministria e Bujqësisë urdhëroi fermat që t’i mbajnë zogjtë në ambiente të brendshme, për të frenuar përhitjen e infeksionit që po ndodh në fakt, me ritme të shpejta. Influenza Avian, e njohur shpesh si gripi i shpezëve, ka rezultuar me asgjësimin e qindra miliona zogjve në gjithë botën, vitet e fundit.
Ajo zakonisht përhapet në vjeshtë dhe dimër dhe është identifikuar në shumë shtete evropiane në javët e fundit, përfshirë Gjermaninë, Holandën dhe Belgjikën. Franca e identifikoi javën e kaluar rastin e parë të ri të virusit në një zonë në veriperëndim të vendit.
Rritja e nivelit të rrezikut nënkupton se të gjithë shpezët duhet të mbahen në ambiente të mbyllura dhe duhet të merren masa mbrojtëse shtesë për ta shmangur përhapjen e sëmundjes. Gripi i shpendëve, i njohur edhe si virusi H5N1, u shfaq së pari në vitin 2003 dhe u pasua nga asgjësimi i rreth 100 milionë shpendëve në Azi, veçanërisht në Vietnam. Humbjet njerëzore dhe ekonomike prej tij në kohë janë konsideruar si shkatërrimtare.
