Vaksina e fruth-rubeolës është kthyer në makth për shume prindër. Fruth-rubeola është një vaksinë që bëhet kur fëmija arrin moshën 1-vjeçare, por sipas Vizion Plus numri i prindërve që refuzojnë për të bërë këtë vaksinë është mjaft i lartë në vendin tonë e konkretisht në Tiranë. Debatet në mbarë botën se ajo stimulon autizmin, po shkaktojnë frikë kudo. Por specialistë të Institutit të Shëndetit Publik, sqarojnë se pasojat tek të pavaksinuarit janë fatale deri në humbje jete.
Ditët e fundit, aktori i njohur, Robert De Niro, deklaroi se do të tërheqë nga festivali i Tribeca-s një film kontrovers për vaksinën e fruth-rubeolës.
De Niro, që ka themeluar këtë festival të filmit, deklaroi se filmi i doktorit britanik, Andrew Wakefield, “Vaxxed” nuk i kontribuon diskutimeve për lidhjen mes vaksinës dhe autizmit.
Wakefield ka kryer një studim, ku pretendon se ka një lidhje mes vaksinave dhe shtimit të rasteve të autizmit.
Por pretendimet e tij nuk janë mbështetur në asnjë rast nga komuniteti shkencor.
Megjithatë ekziston një teori konspirative, e cila thekson se kompanitë e mëdha farmaceutike po e mbajnë të fshehtë këtë lidhje.
Të mërkurën, De Niro, ka folur për vendimin e tij për të hequr filmin nga festivali.
Aktori i njohur, që ka vetë një fëmijë autik, tha se i vjen keq për vendimin që ka marrë.
“Unë thjesht doja që njerëzit të shohin filmin dhe të vendosin vetë,” tha 72-vjeçari gjatë një interviste.
“Le të gjejmë të vërtetën. Thjesht të gjejmë të vërtetën”.
Aktori ka një djalë 18-vjeçar me autizëm.
“Ka shumë gjëra që nuk janë thënë. Por askush nuk do të flasë për këtë”.
“Unë nuk jam kundër vaksinave, por jam pro vaksinave të sigurta”.
“Ka shumë debat për këtë çështje. Kjo për shkak se ka shumë njerëz që thonë se fëmija e tyre ka ndryshuar brenda natës pas vaksinës”.
“Gruaja ime më thotë se kështu ka ndodhur edhe me djalin tim. Unë nuk e mbaj mend, por fëmija im është autik”.
“Unë, si prind i një fëmije me autizëm jam i shqetësuar dhe dua të di të vërtetën”.
Aktori është i martuar me Grace Hightower.
