Roveri Chandrayan-3 i Indisë ka zbuluar squfur dhe disa elementë të tjerë kimikë pranë polit jugor hënor ndërsa kërkon për gjurmë të akullit të ujit gati një javë pas uljes së tij historike në Hënë, tha të martën agjencia hapësinore indiane.
Instrumenti spektroskopik i roverit zbuloi gjithashtu alumin, hekur, kalcium, krom, titan, mangan, oksigjen dhe silikon në sipërfaqen hënore, tha Organizata Indiane e Kërkimeve Hapësinore (ISRO) në një postim në faqen e saj të internetit.
Chandrayan-3 pritet të kryejë eksperimente për një periudhë prej 14 ditësh , tha ISRO.
Anija kozmike “konfirmon pa mëdyshje praninë e squfurit”, njoftoi ISRO. Ajo po kërkon gjithashtu shenja të ujit të ngrirë që mund të ndihmojnë misionet e ardhshme të astronautëve, si një burim i mundshëm i ujit të pijshëm ose për prodhimin e karburantit të raketave.
