Vendimi i qeverisë për të mbyllur TikTok ka sjellë efektin e kundërt, duke shtuar ndjeshëm numrin e përdoruesve dhe kohën e qëndrimit në këtë rrjet social.
Brenda pesë ditëve, numri i përdoruesve të TikTok në Shqipëri është trefishuar, ndërsa shumë prej tyre po përdorin aplikacione VPN për të aksesuar platformën. Sipas ekspertëve të IT, kërkesa për këtë rrjet social ka përfshirë edhe ata që më parë nuk e kishin një llogari në TikTok.
Eksperti i IT, Tomi Kallaxha, thekson:
“Duke qenë se është folur kaq shumë për këto VPN dhe njerëzit i ka kapur dëshira për të aksesuar TikTok-un, që është bllokuar nga kompanitë telefonike, tashmë në top dhjetë aplikacionet më të shkarkuara, gjashtë prej tyre janë VPN, ndërsa TikTok renditet në vendin e dhjetë. Numri i përdoruesve vetëm në muajin mars është rritur me 60-80 mijë.”
Megjithatë, TikTok nuk është i vetmi aplikacion që ka tërhequr vëmendjen e shqiptarëve. Ata po përdorin gjithnjë e më shumë telefonin për edukim, sport, filma dhe bastet e palejuara.
“Një fjalë kyçe shumë specifike që është tepër interesante është se vajzat po kërkojnë profesionet më të mira në teknologjinë e informacionit. Gjithashtu, ka një rritje të madhe të shkarkimeve për serialin ‘Adoleshenca’. Në fund, shqiptarët janë të pushtuar nga futbolli dhe bastet online”, shton Kallaxha.
Pavarësisht paralajmërimeve të ekspertëve të IT se përdorimi i VPN është i rrezikshëm, pasi të dhënat personale mund të komprometohen dhe të keqpërdoren nga hakerët, kjo nuk i ka ndaluar shqiptarët të gjejnë mënyra alternative për të hyrë në TikTok.
